கனடா சூதாட்ட விடுதி கொள்ளைச் சம்பவம்

கனடாவின் மிள்டன் பகுதியில் வாகனம் மற்றும் சூதாட்ட விடுதி ஒன்றில் அடுத்தடுத்து அரங்கேறிய கொள்ளைச் சம்பவங்கள் தொடர்பாக இரண்டு நபர்களை ஹால்டன் பிராந்திய காவல்துறையினர் அதிரடியாகக் கைது செய்துள்ளனர். அவர்களிடமிருந்து ஆபத்தான துப்பாக்கிகள் மற்றும் ஆயுதங்கள் பறிமுதல் செய்யப்பட்டுள்ளன.

கடந்த செப்டம்பர் 2 ஆம் தேதி மிள்டன் பகுதியில் நிறுத்தி வைக்கப்பட்டிருந்த வாகனம் ஒன்றை உடைத்து, அதிலிருந்த குறிப்பிட்ட தொகை ரொக்கப் பணம் மற்றும் கைக்கடிகாரம் உள்ளிட்ட மதிப்புமிக்க பொருட்களை மர்ம நபர்கள் திருடிச் சென்றனர். அதனைத் தொடர்ந்து செப்டம்பர் 3 ஆம் தேதி, அதே நபர்கள் அப்பகுதியில் உள்ள ‘எலிமெண்ட்ஸ் காசினோ’ சூதாட்ட விடுதிக்குள் நுழைந்து, சேவைப் பிரிவின் பணப் பெட்டியில் இருந்த ரொக்கப் பணத்தைக் கொள்ளையடித்துள்ளனர். பாதுகாப்புப் பணியாளர்கள் அவர்களைப் பிடிக்க முயன்றபோது அவர்கள் அங்கிருந்து தப்பிச் சென்றனர்.

இச்சம்பவம் தொடர்பாக வழக்குப் பதிவு செய்து தீவிர விசாரணை மேற்கொண்ட ஹால்டன் பிராந்திய காவல்துறையினர், நார்த் யார்க் பகுதியில் அமைந்துள்ள குடியிருப்பு ஒன்றில் திடீர் சோதனை நடத்தினர். அப்போது அங்கு பதுங்கியிருந்த இரு சந்தேக நபர்களையும் காவல்துறையினர் சுற்றி வளைத்துக் கைது செய்தனர்.

கைது செய்யப்பட்டவர்கள் நார்த் யார்க் பகுதியைச் சேர்ந்த இராக்லி ஷாரியா மற்றும் டேவிட் குக்கிலாவா என அடையாளம் காணப்பட்டுள்ளனர். அவர்களிடமிருந்து மூன்று தோட்டாக்கள் நிரப்பப்பட்ட மேகசின்களுடன் கூடிய ‘க்ளாக் 17’ ரக கைத்துப்பாக்கி, இரண்டு மேகசின்களுடன் கூடிய ‘நோரின்கோ’ ரக ரைபிள் துப்பாக்கி, ஒரு ஸ்பிரிங் கத்தி மற்றும் வாகனத்தில் திருடப்பட்ட பொருட்கள் ஆகியவை மீட்கப்பட்டன. இவர்கள் மீது சட்டவிரோதமாகத் துப்பாக்கிகள் வைத்திருத்தல் மற்றும் குற்றச் செயல்கள் வாயிலாக ஆயுதங்களைப் பெறுதல் உள்ளிட்ட பல்வேறு குற்றப்பிரிவுகளின் கீழ் வழக்குப் பதிவு செய்யப்பட்டுள்ளது.